តើអ្វីជាជំងឺមហារីក?

រាងកាយរបស់មនុស្សត្រូវបានបង្កើតឡើងដោយកោសិកាប់រាប់លានលាន ដែលកោសិកានីមួយៗមានផ្ទុកហ្សែនសម្រាប់គ្រប់គ្រងការលូតលាស់ ការបែងចែក និងការងាប់ទៅវិញនៃកោសិកា។ នៅក្រោមលក្ខខណ្ឌធម្មតា កោសិកានឹងលូតលាស់ បែងចែក និងត្រូវបានជំនួសមកវិញតាមដំណើរការដែលមានសណ្តាប់ធ្នាប់។  

ជំងឺមហារីកកើតឡើងនៅពេលដែលដំណើរការនេះត្រូវបានរំខាន។ កោសិកាមិនប្រក្រតីចាប់ផ្តើមលូតលាស់ និងបែងចែកដោយគ្មានការគ្រប់គ្រង ហើយមិនឆ្លើយតបទៅនឹងសញ្ញាគ្រប់គ្រងធម្មតារបស់រាងកាយនោះទេ។ យូរៗទៅ កោសិកាមិនប្រក្រតីទាំងនេះអាចប្រមូលផ្តុំគ្នាបង្កើតជាដុំសាច់ ដែលរំខានដល់មុខងារធម្មតារបស់រាងកាយ។  

ដុំសាច់　គឺជាដុំកោសិកាមិនប្រក្រតីដែលកកើតឡើងនៅពេលដែលកោសិកាបែងចែកលឿនជាងធម្មតា ឬមិនងាប់ទៅវិញនៅពេលដែលពួកវាគួរតែងាប់។ ដុំសាច់អាចកកើតឡើងស្ទើរតែគ្រប់ផ្នែកទាំងអស់នៃរាងកាយ ហើយមានទំហំ អត្រាលូតលាស់ និងការវិវត្តខុសៗគ្នា។  

ជាទូទៅ ដុំសាច់ត្រូវបានបែងចែកជាពីរប្រភេទធំៗ៖  

• ដុំសាច់ស្រាល គឺជាដុំសាច់មិនមែនមហារីក ហើយជាទូទៅស្ថិតនៅកន្លែងដែលវាបានកកើតឡើងប៉ុណ្ណោះ។ ទោះបីជាពួកវាមិនរីករាលដាលទៅផ្នែកផ្សេងទៀតនៃរាងកាយក៏ដោយ ក៏ពួកវានៅតែអាចបង្កជាបញ្ហាសុខភាពផងដែរ ប្រសិនបើពួកវាលូតលាស់ធំ ឬសង្កត់លើសរីរាង្គ ឬលិកា (សរសៃ) ដែលនៅជិតនោះ។  
• ដុំសាច់កាច គឺជាដុំសាច់មហារីក ដែលអាចលុកលុយលិកា (សរសៃ)ជុំវិញ ព្រមទាំងអាចរីករាលដាលទៅកាន់ផ្នែកផ្សេងទៀតនៃរាងកាយ។  

មិនមែនជំងឺមហារីកទាំងអស់សុទ្ធតែបង្កើតជាដុំសាច់នោះទេ។ ជំងឺមហារីកមួយចំនួន ដូចជាជំងឺមហារីកឈាម ជាដើម គឺប៉ះពាល់ដល់ឈាម និងមជ្ជារបស់ឆ្អឹង (ខួរឆ្អឹង) ហើយជាទូទៅមិនបង្កើតជាដុំសាច់រឹងនោះឡើយ។ 

ការរាលដាលនៃមហារីក សំដៅលើការរីករាលដាលនៃកោសិកាមហារីកពីទីតាំងដើមដំបូង ទៅកាន់ផ្នែកផ្សេងទៀតនៃរាងកាយ តាមរយៈចរន្តឈាម ឬប្រព័ន្ធទឹករងៃ។ ករណីនេះអាចក៏កើតឡើងបន្ទាប់ពីដុំសាច់ដើមត្រូវបានព្យាបាល ឬវះកាត់យកចេញរួចហើយក៏ដោយ។ ការរាលដាលនៃមហារីកអាចប៉ះពាល់ដល់សរីរាង្គដែលនៅឆ្ងាយៗ និងធ្វើឱ្យការព្យាបាលជំងឺមហារីកមានភាពស្មុគស្មាញជាងមុន។  

ការកំណត់ប្រភេទ និងប្រភពដើមជាក់លាក់នៃជំងឺមហារីក គឺជារឿងសំខាន់បំផុត ដោយការសម្រេចចិត្តលើវិធីសាស្ត្រព្យាបាលគឺផ្អែកទៅលើទីតាំងដើមដំបូង លក្ខណៈជីវសាស្ត្រ និងការវិវត្តនៃជំងឺមហារីកនោះ។ ដោយសារតែជំងឺមហារីកមានភាពខុសប្លែកគ្នាយ៉ាងច្រើន ដូឆ្នេះដើម្បីធានាបាននូវការព្យាបាលដ៏សមស្រប និងមានប្រសិទ្ធភាព ការធ្វើរោគវិនិច្ឆ័យដ៏ត្រឹមត្រូវគឺជារឿងដែលមិនអាចខ្វះខាតបាន។